Diaranson 28 di April, partido Accion 21 a tene un conferencia di prensa unda nan a anuncia 3 candidatonan nobo. Lider di partido, Miguel Mansur, a presenta Leonardo Maduro, Hans Zaandam y Leonardo Figaroa.
Leonardo Maduro ta conoci den e mundo di politica for di 2017. E la trece dilanti diferente aspecto nan di educacion, door di su mesun experiencia personal como dentista. E ta boga pa e mehoracion di e oportunidadnan pa Arubianonan cu ta bay studia afo, y kier bin bek Aruba pa eherce nan profesion. Pa e motibo nan aki, e la dicidi di uni su mes na partido Accion 21.
Hans Zaandam, ta un Logistiek Manager cu mas di 30 aña di experencia den diferente posicionan. E la drenta den politica door di wak cu tur e promesanan di gobiernonan anterior pa mehora diferente aspectonan di sistema di Aruba no wordo cumpli. E ta haya cu ta e momento pa cumpli, e momento di tuma accion. “Como pensionado hoben, mi kier contribui for di mi perspectiva como profesional experencia y trece cambionan positivo”.
Di tres candito ta Leonardo Figaroa; e ta e candidaton di mas hoben cu a dicidi di drenta politica di e islanan ABC. Leonardo ta conoci pa ta un sirbidor di nos comunidad. E ta un hoben cu ta tuma iniciativa pa para pa derechonan di nos hubentud. Semper e tabata tin un interes den trece mehoracion pa Aruba y su futuro generacionan. E ta un hoben pasiona, determina y cla pa tuma accion.
Te cu aworaki e lista di Accion 21 ta conforma di 11 candidato incluyendo lider di partido Miguel Mansur. E team completo di Accion 21 ta invita un y tur forma parti di e solucion y bira un “Accionista”.
