Sistema Parlamentario
Pais Aruba ta wordo goberna por medio di un democracia representativo y nos constitucion conoce un sistema parlamentario. Den un democracia basa riba representacion di pueblo, eleccion ta tuma luga regularmente. Den e caso aki, esaki kiermen cu e eleccion en principio ta tuma luga cada cuatro aña. Eleccion provisional por tuma lugar solamente den e caso cu gobierno haci uzo di su derecho pa disolve Parlamento di Aruba.
E principio basico di e sistema electoral di Aruba ta ancra den nos Constitucion. Basicamente, e eleccion ta tuma lugar segun e sistema di representacion proporcional, na unda ta conta e cantidad total di e votonan emiti y ta dividi esaki door di e cantidad di asiento (21). E resultado di esaki ta wordo referi como e “kiesdeler” despues di eleccion. E asientonan asina ta ser reparti den forma proporcional entre e candidatonan ariba e listanan di partido.
Den nos sistema, cada votado por emiti solamente un voto y e votacion ta completamente secreto. E stipulacion aki kiermen cu ningun hende por ser obliga pa bisa pa kende e la vota pe. Consecuentemente, e votacion ta liber, cual ta nifica cu e votado no por ser influencia na un forma inadmitibel ora di voto. Ademas Aruba no conoce un obligacion pa vota. Tur hende cu haya un yamada pa eleccion por dicidi si e ta bay vota of no. Pesey nos ta papia na Aruba di e derecho di voto.
aña pa cada eleccion
asiento
solo voto pa cada votado
Pa por vota den e eleccion venidero
- Mester tin nacionalidad Hulandes;
- Mester ta inscribi den e Registro Civil/Censo y e registro di vota;
- Mester a cumpli cu e condicion aki no mas tarda cu 10 di juli 2013;
- Mester tin minimo 18 aña di edad riba e dia di eleccion;
- No mester ta exclui di e derecho di voto.
Ademas pa por participa na e eleccion mester:
- tin e carchi di voto rekeri cu bo;
- por identifica bo mes cu;
- un cedula valido;
- un paspoort Hulandes of un rijbewijs Arubano, Antiano of Hulandes.
Mescos cu e otro tres Paisnan den Reino, Aruba tambe conoce e asina yama democracia parlamentario. Cada ciudadano ta escoge su representantenan por medio di e miembronan di Parlamento, cu mester vocifera nan opinion. Parlamento ta consisti di 21 miembro, kendenan ta keda elegi por medio di eleccion, cual ta liber y secreto. Por medio di e miembronan di Parlamento, pueblo por eherce influencia ariba e maneho di Gobierno. Pa un persona por bira miembro di Parlamento tin diferente rekisito cu e mester cumpli cune. E persona mester ta un habitante di Aruba, e mester tin nacionalidad Hulandes, e mester a alcansa e edad di bintiun aña y e no ta exclui di derecho di vota.
Despues cu Conseho Supremo Electoral fiha e resultado di eleccion, tur candidato pa miembro di Parlamento mester entrega su credencialnan na Parlamento. E credencialnan ta consisti di dos documento, cual ta e notificacion di e Conseho Supremo Electoral cu e candidato a keda elegi y e prueba cu Presidente di Conseho Supremo Electoral a ricibi for di e candidato pa miembro di Parlamento, cual ta indica cu e ta acepta su eleccion.
E investigacion di credencialnan ta enfoca principalmente ariba controla si e candidato pa bira miembro di Parlamento, no ta eherce un funcion cu ta imcompatibel cu e funcion di miembro di Parlamento. E funcionnan aki ta e.o. miembro di Conseho Consultativo of di Contolaria General (Rekenkamer), Gobernador interino, Ministro, Hues of empleado publico den servicio activo. Mescos cu Ministronan, pa miembro di Parlamento tambe ta conta cu no tin mag di existi lasonan familiar te den di dos grado entre miembronan di Parlamento. Despues di a aproba e credencialnan, e candidato pa bira miembro di Parlamento ta huramenta dilanti di Gobernador y e por cuminsa eherce su funcion oficialmente.
