Media3 Candidato nobo a subi lista di partido Accion21

May 1, 2021

Un bes mas, partido Accion21 a tene un conferencia di prensa na nan CEDE pa anuncia tres candidato nobo cu a subi riba e lista. Actualmente, e lista di Accion 21 ta consisti di 14 candidato, incluyendo e tres nobo cu a wordo anuncia awe.

Lider di partido, Sr Miguel Mansur a introduci e tres candidato nobo: Tony de Jonge, Raymundo Dijkhoff, y Mitchell Ho-Asjoe.

Tony de Jonge a studia pa Docente di Historia cu un minor den Geografia na Ehva Hogeschool na Amsterdam. Na aña 2007 e la haya e oportunidad pa drenta den enseñansa na Aruba y te e dia di awe ainda e ta traha como docente di Historia y Geografia na Juliana School. Despues di 14 aña den enseñansa e la haya cu ta tempo pa un cambio, y e la dicidi cu esaki ta e momento y e partido corecto pa drenta den politica. “Mi motibonan ta simpel y sincero; uno, Mi kier dignidad y respet bek pa nos docentenan. Ta tempo pa nan haya nan voz bek y dos, mi kier pa nos studiantenan ta prepara mas miho posibel pa nan por bai dilanti pa un futuro miho pa nan.”

Raymundo Dijkhoff ta e prome arqueologo Arubano. Despues di gradua di Colegio Arubano e la bay Hulanda y haya su drs. den Arqueologia y Historia Cultural di America Indigena. E tin 22 aña eherciendo su trabou na Aruba como hefe di departamento di coleccion y investigacion na Museo Arqueologico Nacional di Aruba. Raymundo semper a y lo para pa e preservacion di nos patrimonio cultural y natural. Raymundo a expresa cu su dos areanan di interes ta Cultura y Deporte. E semper a practica deporte (Ajedrez y baseball) y a representa Aruba internacionalmente. Alabes, pa hopi aña e la desaroya su mes como dirigente y entrenador. “Deporte y cultura ta un instrumento pa forma nos hubentud y yudanan explora nan potencial, bira un bon ciudadano, y cuida nan salud mental y fisico. Mi kier wak pa cultura y deporte haya un posicion real cu nan ta merece den politica”.

Mitchell Ho-Asjoe a cuminsa gradiciendo e apoyo cu e la haya di tur hende durante full e trayecto di e iniciativa “Ta Basta” cu ta para contra abuso di mucha. Tambe e la gradici lider di partido Miguel Mansur pa e oportunidad aki pa join Accion 21 y sigui lucha pa e causa. Mitchell a resalta e consecuencia masha profundo pa e victima y esnan serca di dje si nan no wordo trata debidamente. E la papia di su intencion pa yuda implementa un plan pa drecha e comunicacion entre e instancianan social pa asina nan por atende cu e problemanan. “Mi ta kere firmemente cu nos por duna e muchanan un mihor futuro. Nan merese esey di nos. Esaki ta mi compromiso cu Aruba.”

Kico nos lo haci?

Ken nos ta?

Pa ken nos t’ey?

Bira Accionista Voluntario!

Selecta tur opcion cu bo ta interesa aden y nos lo dunabo tur e detayenan necesario.

    Haci yamada
    Data Entry
    Bira Accionista
    Asisti cu Social Media
    Asisti cu Fundraising
    Bishita na cas

    Combersa cu nos!

    Manda nos bo sugerencia, idea y pregunta.