Despues cu Gerald a caba Colegio Arubano (HAVO), na 1989 e la bay Hulanda y a sigui su estudio na HEAO Den Bosch den e studierichting Bestuurskunde. Despues di a caba su estudio exitosamente, na augustus 1995 e la wordo nombra como ambtenaar na Cuerpo Policial Aruba den e function di Beleidsmedewerker P&O. Den transcurso di mas cu 27 anja Gerald a traha como consehero di diferente Minister di Justicia y finalmente como director di IASA (Immigratiedienst).
Como director di IASA, Gerald a logra introduccion di e E-gates na aeropuerto bao di e projecto “Happy Flow”. Gerald ta orguyoso cu “Happy Flow” a gana premio internacional. Tambe Gerald tawata un speaker na e “Traveller identification program (TRIP) conference” na headquarters di “International Civil Aviation Organisation (ICAO)” na Montreal, Canada.
Ademas di esaki, Gerald a haya e oportunidad di sigui un curso organisa door di “Department of Homeland Security di Merca”. E curso cu Gerald a sigui tawata tin un duracion di 3 siman y a wordo sigui na “Federal Law Enforcement Centre (FLETC)” ubica na Brunswick, Georgia. Na FLETC tur functionario di FBI, Secret Service, CIA, CBP, ICE etc. ta volg curso. E curso tawata riba tereno di refugiado y asilo, di cual e nomber mes ta “Refugee, Asylum and International Operations Directorate Training program.” Gerald ta orguyoso cu e ta un di e tiki studiante extranjero cu exitosamente a pasa e examen di e curso y a ricibi su certificado di esaki.
Gerald a uni su mes na partido di Accion21 eleccion pasa na 2021, door cu ela reconoce su mes den e mission y vision di Accion21 pa crea un politica nobo na Aruba.
Gerald ta boga pa crea un sistema mas husto y productivo den sector publico pa Pais Aruba.