Habriendo un caminda nobo, cu oportunidadnan nobo pa tuma Accion!

April 9, 2021

Analisando e trayecto politico riba nos pais di e ultimo 20 aña, e resultadonan cu politica tradicional a trece pa nos pais tabata desastroso. Politica tradicional a trece impactonan negativo pa e trahado, studiante, y ciudadano: Y locual ta resona ta cu nan a perde confiansa den e abilidad di politica tradicional pa trece e solucionnan cu nos pais mester, specialmente mirando e retonan grandi cu e pandemia a trece cu ne, y generalmente drentando e siglo nobo.

E pueblo mes ta harta di e sistema anticua di politica, di scucha promesanan durante campaña cu despues nunca ta wordo cumpli.

Como partido liberal progresivo, Accion21 ta kere den un aparato gubernamental eficiente, transparente y honesto.

Esaki ta momentonan pa Accion;accion mas cu palabra. Accion pa revitalisa nos economia, accion pa sanea nos finansas, ataka e crisis social, reforma nos sistema gubernamental, amplia nos sistema di enseñansa, introduci cuido preventivo den salubridad publico y enfoca riba sostenibilidad pa salvaguardia nos medio ambiente.

Ban kibra nos ciclonan vicioso y recupera un gobernacion confiabel. Hunto, esaki y hopi mas ta posibel.

Solucion ta bin ora cu bo tuma Accion!

Cada cuidadano merece sosten pa alcansa su potencial maximo.

Kico nos lo haci?

Poniendo agendanan politico previo na un banda, nos lo re-establece un bon relacion den reino pa salvaguardia y alavez ta na vanguardia di Aruba su autonomia, cumpliendo nos parti pa asina exigi cumplimento di e tratado sagrado aki. Esaki ta inicio di recuperacion di e desaster cu partidismo y corupcion di e ultimo añanan a laga atras. Mundo a cambia desde cu nos a gana nos status aparte y nos tin cu demostra cu nos tin e capacidad di por lidera nos propio destino a base di accionnan transparente y honesto. Accion sano lo vence tur menasa.

Nos lo inverti den reforma di nos sistema social, educacional, hudicial, fiscal, financiero y economico cu ainda ta pertenece den siglo 20. Nos hendenan merece di biba den un sociedad na unda deber y derechonan ta wordo honra den e tempo cu nos ta bibando aden, den siglo 21. Solamente atravez di modernizacion di nos leynan un gobierno por duna atencion y atende tur Aruba su problemanan social, financiero y economico. Esaki ta rekeri curashi, esaki ta rekeri accion.

Cu un sistema legal solido, nos por establece mas cu gobernacion, sino un maneho independiente, husto, igual y transparente pa tur ciudadano. Sin importa ken bo ta, bo merece un miho servicio gubernamental den forma honesto sin intimidacion of patronismo. Esaki ta e unico forma cu nos por proteha libertadnan constitucional di cada ciudadano, como tambe esnan mas vulnerabel den comunidad. Bo deber y derechonan ta bai wordo honra segun ley, no aprobacion politico, esey ta accion berdadero.

Ken nos ta?

Nos ta kere den un aparato gubernamental; eficiente, transparente y honesto. ACCION21 ta kere den un mehoracion di relacion dentro di Reino, y alabes kier mira mas cooperacion cu Hulanda. Nos lo tuma accion pa revitalisa nos economia, sanea nos finansas, ataca e crisis social, reforma nos sistema gubernamental, amplia nos sistema di enseñansa, introduci cuido preventivo den salubridad publico y enfoca ariba sostenibilidad pa salvaguardia nos medio ambiente. Finalmente, Accion21 ta un partido pa pueblo. Tur gobierno t’ey pa ehecuta boso deseo y ambicionnan, p’esey nos kier tende di bo.

Nos ta kere den recupera nos progreso por medio di desaroyo economico sostenibel, husto y transparente. Desaroyonan economico mester bay man den man cu nos sociedad, nos hendenan y nan potencial absoluto, no agenda politico.

Nos ta para pa elimina e ‘red tape,’ faboritismo y populismo. Nos lo inicia e sanacion di nos situacion financiero y activa progreso di nos pais. E progreso y libertad cu pa generacionnan nos pueblo a anhela. Integridad ta mas cu un palabra, e ta un accion cu mester ta visibel pa tur ciudadano a base di hecho y ehempel.

Pa ken nos t’ey?

Pa e pueblo di Aruba cu kier recupera balor y credibilidad den nos sistema gubernamental. Nos kier recobra e esencia di nos autonomia cu tanto nos a bringa p’e, Igualdad. Creando miho relacionan y confiansa den Reino, nos por cumpli cu e libertadnan cu nos sagrado constitucion ta priminti na nos pueblo.

Pa nos grandinan cu ta forma un grupo grandi di nos comunidad cu ta enfrentando retonan economico y social cu nunca nos a yega di experencia. Nos grandinan merece un bon calidad di bida y cuido en general.

Pa nos pueblo trahado, cu for di prome a wordo asota pa e pandemia, ya caba tabata wordo limita den progreso profesional y personal debi na un sistema burocrático, anticua y nepostista. Manera nos a anhela pa libertad di nos pais, nos trahadonan merece e libertad di por desaroya y biba segun su potencial maximo pa asina yuda saca nos pais di e crisis financiero actual.

Nos hoben y adultonan cu ta buscando un speransa pa nan futuro. For di esnan cu estudio cu no por haya oportunidad laboral, y tambe e grupo grandi di hobennan cu no tin opcion inclusivo di desaroyo profesional of progreso alguno. Cada hoben riba e isla aki tin potencial, nos mester un sistema di educacion y apoyo pa yuda desaroya e talentonan aki y asina brinda bienestar sostenibel. No ta paso bo a cay na caminda kiermen cu nos ta perde speransa riba bo. Bo merece mas oportunidad. Esey ta libertad berdadero.

Bira Accionista Boluntario!

Selecta tur opcion cu bo ta interesa aden y nos lo dunabo tur e detayenan necesario.

Habriendo un caminda nobo, cu oportunidadnan nobo pa tuma Accion!

Contact

Obhetivo

Con bo por yuda

Danki pa tuma Accion!

Kico nos lo haci?

Ken nos ta?

Pa ken nos t’ey?

Bira Accionista Boluntario!

Combersa cu nos!