Daphne Lejuez lo forma parti di e team ‘Accion21’ pa eleccion 2021

April 9, 2021

Diaranson mainta durante un conferencia di prensa, parlamentario independiente Daphne Lejuez a oficialmente anuncia cu e lo forma parti di e team di ‘Accion 21’, un partido nobo lidera pa sr. Miguel Mansur, pa e siguiente eleccion di 2021.

“E no tabata un decision facil, mirando cu originalmente mi no tabata tin e intencion di continua den politica,” sra. Lejuez ta expresa. Despues di e caida repentino di Gobierno, y despues di a delibera cuidadosamente den seno familiar, e fin di siman di Pasco Grandi, sra. Lejuez a dicidi di tog bay continua den politica pa asina por sigui sirbi su pais, sigur mirando tur e retonan grandi cu nos como pais y como ciudadano lo bay ta enfrentando, segun e ta comenta. Particularmente, mi yiunan ta su yiunan a encurash’e pa sigui y purba na continua haci un diferencia, y no ‘give up’ asina facil. Pues, awe sra. Lejuez a anuncia oficialmente cu lo sigui como candidato di e team di Accion 21, lidera pa su amigo y visionario sr. Miguel Mansur.

Pa kico ‘Accion 21’?
Segun sra. Lejuez a declara durante e rueda di prensa: ‘Loke a atraemi na e partido Accion 21 primeramente ta e hecho cu e ta un partido nobo y no-tradicional. Conociendo sr. Miguel Mansur personalmente, y despues di a scucha su ideanan y solucionan pa cu nos Pais pa e situacion financiero y socio-economico cu nos ta bibando, na unda ta brinda opcionan realistico y implementabel a corto, medio y largo plaso den cuadro di e Landspakket y tambe SDG’s, mi ta sinti cu esakinan ta cuadra cu mi vision.”

Sra. Lejuez ta haya cu mas cu tur cos, e ta cuadra cu e Aruba cu e kier wak pa nos hendenan y futuro generacionan. “Na unda lo restructura y reforma nos aparato gubernamental pa haci esaki mas eficiente, productivo, accesibel y transparente pa trece bek confiansa den gobernacion,” sra. Lejuez a sigui expresa.

Pueblo kier mira algo diferente!
Sra. Lejuez a sigui na splica cu e vision di Accion 21 ta uno cu lo tin atencion pa revitalisa nos economia, pa asina nos por atrae inversion,crea cuponan di trabou pa nos comunidad y crea oportunidadnan pa nos por stimulanos studiantenan regresa nan Pais. Esaki ta un team enfoca na crea un comunidad mas husto y unda lo enfoca riba derechonanfundamental, inclusion y cu riba nivel social tur ciudadano por hiba un bida digno.

Unda cu lo pone enfasis riba enseñansa, paso como mama mi ta compronde e balor di desaroya hoben bon prepara pa enfrenta e mundo di mañan, pero tambe unda enseñansa pa adulto lo haña atencion debido pa nan por sigui desaroya.

Accion 21 ta dedica na pone enfoke pa proteccion di nos medio ambiente, cu ta algo cerca di sra. Lejuez su curason, y un di e motibonan pa cual originalmente el a cuminsa su carera publico. “Mi ta convensi cu Pueblo kier mira algo diferente y mi ta kere cu Accion 21, como un partido politico no-tradicional, por ta e alternativa aki pa dia 25 di juni benidero, unda cu e enfoke lo ta riba saneacion financiero, revitalisacion economico, enseñansa di calidad, derechonan fundamental, husticia social y un reforma gubernamental cu ta basa riba merito y no riba patronahe politico,” segun sra. Lejuez.

Accion 21 pues ta un alternativa basa riba accion, y no solamente planes cu ta keda wordo recicla y warda den lachi sin wordo implementa, segun sra. Lejuez a fuertemente declara durante e rueda di prensa. Mirando e temporada cortico nos dilanti prome cu eleccion, y cu ainda nos ta den temporada di COVID cu un percentahe di transmission relativamente halto, e parlamentario a enfoca di lo kier limita contagio mas tanto posibel y lo ta disponibel usando medio di rednan social, email, whatsapp y reunion virtual pa esnan cu tin acceso na esaki pa por splica mas di nos vision, of contesta cualkier pregunta of inkietud.

Sra. Lejuez: “E decision pa un politica diferente y un gobernacion transparente y confiabel ta den man di cada cuidadano, y cu boso sosten, conhuntamente nos lo por crea un bes mas e Aruba dushi pa biba.”

Bira miembro!

Por fabor yena e formulario aki y nos lo tuma contacto cubo cu mas informacion.

    Danki pa tuma Accion!

    Manda nos bo comprobante di donacion.

      Kico nos lo haci?

      Ken nos ta?

      Pa ken nos t’ey?

      Bira Accionista Boluntario!

      Selecta tur opcion cu bo ta interesa aden y nos lo dunabo tur e detayenan necesario.

        Haci yamada

        Data Entry

        Bira Accionista

        Asisti cu Social Media

        Asisti cu Fundraising

        Bishita na cas

        Combersa cu nos!

        Manda nos bo sugerencia, idea y pregunta.

          Stay up-to-date with the ongoing case; 'Landsverordening openstelling huwelijk' in The Netherlands.
          This is default text for notification bar